ພາກສະເໜີ
ກອງປະຊຸມພົບປະລະຫວ່າງພາກລັດ ແລະ ພາກທຸລະກິດຂັ້ນແຂວງ (PPPD) ແມ່ນກອງປະຊຸມທີ່ຖືກຈັດຕັ້ງຂຶ້ນ ເລີ່ມແຕ່ປີ 2010 ເປັນຕົ້ນມາ ເພື່ອຈຸດປະສົງໃນການປັບປຸງສະພາບແວດລ້ອມການດໍາເນີນທຸລະກິດໃນ ແຂວງສະຫວັນນະເຂດ ໃຫ້ດີຂຶ້ນ ໂດຍການສ້າງກົນໄກໃຫ້ພາກທຸລະກິດ ໄດ້ປຶກສາຫາລືບັນຫາທີ່ພົບພໍ້ໃນການດໍາເນີນທຸລະກິດ ສະເໜີໃຫ້ພາກ ລັດພິຈາລະນາແກ້ໄຂຢ່າງເປັນລະບົບ ແລະ ຕໍ່ເນື່ອງ. ໃນໄລຍະຜ່ານມາ, PPPD ໄດ້ປະກອບສ່ວນຢ່າງຫຼວງຫຼາຍ ເຂົ້າໃນການແກ້ໄຂບັນຫາທີ່ພາກທຸລະກິດພົບພໍ້, ໂດຍສະເພາະ ແມ່ນໃນຂົງເຂດກົດໝາຍ, ສ່ວຍສາອາກອນ, ລະບຽບການຕ່າງໆ ແລະ ການອໍານວຍຄວາມສະດວກທາງດ້ານການຄ້າ.
ເປົ້າໝາຍ
ເປົ້າໝາຍຫຼັກຂອງການຈັດກອງປະຊຸມ PPPD ແຂວງສະຫວັນນະເຂດ ແມ່ນເພື່ອ ຄົ້ນຄວ້າ ແລະແກ້ໄຂບັນຫາສະເພາະຂອງການດໍາເນີນທຸລະກິດໃນແຂວງ, ໂດຍສະເພາະຢ່າງຍິ່ງ ແມ່ນບັນຫາທີ່ຕິດພັນກັບການຈັດຕັ້ງປະຕິບັດກົດລະບຽບ ແລະກົດໝາຍໃນຂັ້ນທ້ອງຖິ່ນທີ່ບໍ່ເປັນເອກະພາບກັບຂັ້ນສູນກາງ, ແລະເພື່ອສະໜັບສະໜູນໃຫ້ພາກທຸລະກິດໃນຂັ້ນທ້ອງຖິ່ນ ໄດ້ມີສ່ວນຮ່ວມໃນການອອກແບບ ແລະປັບປຸງ ນະໂຍບາຍ ແລະ ກົດລະບຽບຕ່າງໆ ທີ່ພາກລັດ ທັງໃນຂັ້ນສູນກາງ ແລະທ້ອງຖິ່ນວາງອອກ.
ເພື່ອສ້າງກົນໄກການປະສານງານ ລະຫວ່າງພາກລັດ ແລະ ພາກທຸລະກິດ ໃຫ້ມີຄວາມກົມກ່ຽວ, ສອດຄ່ອງ, ໄດ້ຮັບຜົນດີ, ມີປະສິດທິຜົນ ແລະ ຖືກຕ້ອງກັບລະບຽບກົດໝາຍ ໂດຍການປຶກສາຫາລື ການແກ້ໄຂຂອດຕ່າງໆທີ່ບໍ່ສະດວກ ກົດໜ່ວງສ້າງຄວາມຫຍຸ້ງຍາກ ເປັນການເພີ່ມຕົ້ນທຶນໃຫ້ແກ່ການດຳເນີນທຸລະກິດ. ທັງເປັນການປັບປຸງສະພາບແວດລ້ອມການດຳເນີນທຸລະກິດ ແລະ ສ້າງຄວາມເຂັ້ມແຂງໃຫ້ແກ່ພາກທຸລະກິດພາຍໃນແຂວງ. ສະພາການຄ້າ ແລະ ອຸດສາຫະກຳແຂວງ ຮ່ວມກັບ ພະແນກ ອຸດສາຫະກຳ ແລະ ການຄ້າແຂວງ ໂດຍໄດ້ຮັບການຊີ້ນຳ ຈາກການນຳຂັ້ນແຂວງ ໃນການຈັດຕັ້ງກອງປະຊຸມພົບປະພາກລັດ ແລະ ພາກທຸລະກິດໃນແຕ່ລະປີຂື້ນ
ຂັ້ນຕອນການດຳເນີນກອງປະຊຸມ
- ສະພາການຄ້າ ຈະເປັນຜູ້ເກັບກຳບັນຫາ, ຂໍ້ຫຍຸ້ງຍາກ ແລະ ຂໍ້ສະເໜີ ຈາກສະມາຊິກ, ພາກທຸລະກິດ, ກຸ່ມ ແລະ ສະມາຄົມ
- ເລືອກເຟັ້ນ ແລະ ສັງລວມບັນຫາ, ຂໍ້ຫຍຸ້ງຍາກ ແລະ ຂໍ້ສະເໜີ ສົ່ງໃຫ້ແກ່ພະແນກອຸດສາຫະກຳ ແລະ ການຄ້າແຂວງ
- ບັນຫາຕ່າງໆຈະຖືກກວດຄືນ ແລະ ຈັດລຽງບຸລີມະສິດ ໃນການແກ້ໄຂ ໂດຍຜ່ານພະແນກການຄ້າ, ພະແນກການທີ່ກ່ຽວຂ້ອງ, ສະພາການຄ້າ ແລະ ພາກທຸລະກິດ ( ກອງປະຊຸມທາງດ້ານວິຊາການ), ຫາກບັນຫາ ຫຼື ຂໍ້ສະເໜີຕ່າງໆ ບໍ່ສາມາດແກ້ໄຂໄດ້ໃນຂັ້ນກອງປະຊຸມວິຊາການ ບັນຫາຕ່າງໆຈະຖືກນຳສະເໜີ ແລະ ລາຍງານໃນກອງປະຊຸມພົບປະພາກລັດ ແລະ ພາກທຸລະກິດຂັ້ນແຂວງ
- ກອງປະຊຸມພົບປະລະຫວ່າງພາກລັດ ແລະ ພາກທຸລະກິດຂັ້ນແຂວງ ເປັນກອງປະຊຸມ ລາຍງານຜົນຂອງການແກ້ໄຂບັນຫາ ແລະ ຂໍ້ສະເໜີຕ່າງໆທີ່ໄດ້ປະຊຸມຮ່ວມກັບພາກທຸລະກິດ ຂັ້ນພະແນກການທີ່ກ່ຽວຂ້ອງ. ນອກຈາກນີ້ ຍັງເປັນການລາຍງານບັນຫາ ແລະ ຂໍ້ສະເໜີ ໃນກອງປະຊຸມວິຊາການທີ່ບໍ່ສາມາດແກ້ໄຂໄດ້ ຕໍ່ການນຳຂັ້ນສູງຂອງແຂວງເພື່ອຮັບຊາບ ແລະ ຂໍທິດຊີ້ນຳໃນການຈັດຕັ້ງປະຕິບັດ
ໃນກອງປະຊຸມດັ່ງກ່າວຈະປະກອບມີບັນດາການນຳຂັ້ນສູງຂອງແຂວງ, ບັນດາທ່ານຫົວໜ້າພະແນກການ, ຮອງຫົວໜ້າພະແນກການ, ຫົວໜ້າຂະແໜງການ, ວິຊາການຈາກພາກລັດທີ່ກ່ຽວຂ້ອງ ພ້ອມດ້ວຍ ຄະນະປະທານ ຈາກສະພາການຄ້າ ແລະ ອຸດສາຫະກຳແຂວງ, ບັນດາອຳນວຍການບໍລິສັດ, ຮອງອຳນວຍການບໍລິສັດ , ຮ້າງຮ້ານກໍ່ເຂົ້າຮ່ວມ.
ບັນຫາ ແລະ ຄວາມຄືບໜ້າໃນການຈັດຕັ້ງກອງປະຊຸມ PPPD
- ເອກະສານດາວໂລດບັນຫາ ປີ 2018
- ເອກະສານດາວໂລດບັນຫາ ປີ 2019
- ເອກະສານດາວໂລດບັນຫາ ປີ 2020
- ເອກະສານດາວໂລດບັນຫາ ປີ 2021
- ເອກະສານດາວໂລດບັນຫາ ປີ 2022
ໜ່ວຍງານປຶກສາຫາລື ແລະ ສະເໜີບັນຫາ
- ຫ້ອງການບໍລິຫານ ສຄອ.ສຂ 041 253 325, 54066512
- ຂະແໜງບໍລິຫານຫ້ອງການ ສຄອ.ສຂ
- ແບບຟອມສັງລວມບັນຫາ ແລະ ຂໍ້ສະເໜີ
