ກອງທຶນສົ່ງເສີມ ຈຸນລະວິສາຫະກິດ
ບໍລິການ ກອງທຶນສົ່ງເສີມ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນ ດອກເບ້ຍ 6% ຂອງ ສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ.
I ພາລະບົດບາດຂອງ ສຄອ.ສຂ ຫຼື ສບວ.ສຂ ແລະ ສສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ ໃນການຈັດຕັ້ງປະຕິບັດກອງທຶນ
ພາລະບົດບາດ ຂອງສຄອ.ສຂ ແລະ ສບວ.ສຂ ໃນການຈັດຕັ້ງປະຕິບັດກອງທຶນ
- ສະໜອງບັນດາຂໍ້ມູນຂ່າວສານ ແລະ ໃຫ້ຄຳແນະນຳທີ່ຈຳເປັນໃຫ້ແກ່ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນ ດອກເບ້ຍ 06% ຕໍ່ປີ.
- ຮັບຜິດຊອບການລົງທະບຽນຄຳຮ້ອງຂໍສິນເຊື່ອຂອງຈຸນລະວິສາຫະກິດ ແລະ ວິສາຫະກິດຂະໜາດນ້ອຍ.
- ກວດກາບັນດາເອກະສານ ແລະ ເງື່ອນໄຂຕ່າງໆ (ເຊັ່ນ: ໃບທະບຽນວິສາຫະກິດ, ການຖືບັນຊີ, ຜ່ານການຝຶກອົບຮົມທາງດ້ານການຂຽນແຜນທຸລະກິດ, ແຜນການເງີນ) ໃນການເຂົ້າຮ່ວມໂຄງການທີ່ກຳນົດໄວ້ໃຫ້ແກ່ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ກ່ອນຈະນຳສະເໜີໄປຂໍກູ້ຈາກຝ່າຍ ຂ.
- ຮັບຜິດຊອບ ໃນການຈັດຝຶກອົບຮົມ ແລະ ສົ່ງເສີມ ທາງດ້ານວິຊາການ ໃຫ້ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ເພື່ອໃຫ້ເຂົາສາມາດເຂົ້າເຖິງເງື່ອນໄຂໃນການກູ້ຢືມ ດອກເບ້ຍ 6% ຂອງ ສະຖາບັນບັນການເງິນຈຸລະພາກ ທີ່ຮັບເງິນຝາກສາຍໃຍສຳພັນ ເຊັ່ນ: ການຂຽນແຜນທຸລະກິດ, ແຜນການເງິນ ແລະ ບັນຊີເງິນສົດ.
- ອອກໜັງສືຢັ້ງຢືນຄວາມພ້ອມຂອງ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ຈັດສົ່ງລາຍຊື່ຜູ້ມີຄວາມປະສົ່ງເຂົ້າຮ່ວມໂຄງການ ຂັດຕິດກັບເອກະສານສະເໜີຂໍສິນເຊື່ອຂອງແຕ່ລະລາຍເຖິງຝ່າຍ ຂ.
- ຈັດຝຶກອົບຮົມດ້ານວິຊາການທີ່ຈຳເປັນ ບໍ່ວ່າຈະເປັນການຈົດກາຍບັນຊີ, ການຈົດທະບຽນ ຫຼື ຂື້ນທະບຽນວິສາຫະກິດຂັ້ນເມືອງ ແລະ ຂັ້ນແຂວງ, ການຂຽນແຜນທຸລະກິດ ແລະ ດ້ານອື່ນໆທີ່ທາງຝ່າຍ ກ ເຫັນວ່າມີຄວາມຈຳເປັນ ເພື່ອໃຫ້ຈຸນລະວິສາຫະກິດ ແລະ ວິສາຫະກິດຂະໜາດນ້ອຍໄດ້ມີການພັດທະນາເພີ່ມເຕີມ.
- ເກັບກຳບັນດາສະຖິຕິການຈົດທະບຽນຂອງ ຈຸລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ ທີ່ມີຄວາມສົນໃຈໃນການເຂົ້າຮ່ວມໂຄງການດັ່ງກ່າວ.
- ລາຍງານບັນຫາ, ຂໍ້ຫຍຸ້ງຍາກ ແລະ ຂໍສະເໜີ ໃນການຈັດຕັ້ງປະຕິບັດໂຄງການດັ່ງກ່າວໃຫ້ແກ່ ຄະນະຊີ້ນຳແຕ່ລະຝ່າຍ ເດືອນນື່ງ ຕໍ່ຄັ້ງ.
- ຮັບຜິດຊອບຄ່າໃຊ້ຈ່າຍທີ່ຕິດພັນກັບການສົ່ງເສີມວຽກທາງດ້ານວິຊາການ ແລະ ວຽກການບໍລິການໃຫ້ແກ່ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນ 06% ຕໍ່ປີ ດ້ວຍຕົນເອງ.
- ລາຍງານສະພາບການຈັດຕັ້ງປະຕິບັດໂຄງການຮ່ວມມືດັ່ງກ່າວ ໃຫ້ແກ່ ທະນາຄານແຫ່ງ ສປປ ລາວ ພາກກາງ ປະຈຳແຂວງສະຫວັນນະເຂດ ເປັນ……………
ພາລະບົດບາດ ຂອງສະຖາບັນການເງິນຈຸລະພາກ ທີ່ຮັບເງິນຝາກສາຍໃຍສຳພັນ ໃນການຈັດຕັ້ງປະຕິບັດກອງທຶນ
- ພິຈະລະນາບັນດາລາຍຊື່ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ(ຜູ້ເຂົ້າຮ່ວມໂຄງການ) ທີ່ມີການຢັ້ງຢືນ ຫຼື ລົງທະບຽນການເຂົ້າຮ່ວມໂຄງການ ຈາກສະພາການຄ້າ ແລະ ອຸດສາຫະກຳແຂວງ.
- ໃຫ້ການສະໜັບສະໜູນຈຸນລະວິສາຫະກິດ ແລະ ວິາຫະກິດຂະໜາດນ້ອຍ ທີ່ສຳເລັດຫຼັກສູດຕາມເງື່ອນໄຂ (ເຊັ່ນ:ການຂຽນແຜນທຸລະກິດ, ຂະບວນການ ແລະ ແຜນການເງິນ) ແລະ ນອກຈາກນີ້້ ສະຖາບັນຈະໄດ້ພິຈະລະນາ ອະນຸມັດເງິນກູ້ ຕາມລະບຽບ ແລະ ຂັ້ນຕອນຂອງສະຖາບັນ.
- ປະເມີນລູກຄ້າ ຫຼື ປະເມີນຜູ້ເຂົ້າຮ່ວມໂຄງການໃນການອະນຸມັດສິນເຊື່ອ.
- ສະໜອງເງິນກູ້ຕາມເງື່ອນໄຂໃຫ້ແກ່ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ຫຼື ຜູ້ຂໍກູ້.
- ແຈ້ງລາຍລະອຽດຂອງລູກຄ້າທີ່ໄດ້ຮັບສິນເຊື່ອ ໃຫ້ ສະພາການຄ້າ ແລະ ອຸດສາ ຫະກຳແຂວງຮັບຮູ້ນອກຈາກນັ້ນ ຈະສະໜອງລາຍລະອຽດກິດຈະກຳທີ່ເຫັນວ່າມີຜົນປະໂຫຍດແກ່ຜູ້ປະກອບການ. ຖ້າຫາກກໍລະນີທີ່ຜູ້ເຂົ້າຮ່ວມໂຄງການບໍ່ສາມາດໄດ້ສິນເຊື່ອ ຈະຕ້ອງໄດ້ແຈ້ງເຫດຜົນຢ່າງເປັນລາຍລັກອັກສອນສົ່ງໃຫ້ ສະພາການຄ້າ ແລະ ອຸດສາຫະກຳແຂວງສະຫວັນນະເຂດ ຮັບຊາບ ທຸກໆທ້າຍເດືອນ.
- ເປັນຜູ້ເກັບຕົ້ນທົ້ນທຶນ ແລະ ດອກເບ້ຍ ຄືນຈາກບັນດາ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ທີ່ໄດ້ຮັບການອະນຸມັດດ້ວຍຕົນເອງ
II ປະຫວັດຄວາມເປັນມາຂອງກອງທຶນ
ເພື່ອຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂວ່າດ້ວຍຄວາມຫຍຸ້ງຍາກທາງດ້ານເສດຖະກິດ ແລະ ການເງິນ ໂດຍປະກອບສ່ວນເຂົ້າໃນວຽກງານສົ່ງເສີມການເຂົ້າຫາແຫຼ່ງທຶນຂອງ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງແຂວງ , ເພື່ອຊຸກຍູ້ການຜະລິດ ແລະ ສະໜັບສະໜູນວຽກງານສ້າງຄວາມເຂັ້ມແຂງໃຫ້ແກ່ບັນດາວິສາຫະກິດຂະໜາດນ້ອຍ ແລະ ກາງ ໂດຍຜ່ານ ສູນບໍລິການວິສາຫະກິດ ຂະໜາດນ້ອຍ ແລະ ກາງແຂວງ, ເພື່ອສ້າງໂອກາດ ແລະ ເງື່ອນໄຂຕ່າງໆໃຫ້ແກ່ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ສາມາດເຂົ້າເຖິງແຫຼ່ງທຶນໄດ້ຫຼາຍຂື້ນ ແລະ ຊ່ວຍໃຫ້ ວິສາຫະກິດຂະໜາດນ້ອຍ ແລະ ກາງມີການເຕີບໃຫຍ່ຂະຫຍາຍຕົວ ແລະ ເພີ່ມທະວີການຜະລິດເປັນສິນຄ້າ ແລະ ການບໍລິການ ສະນັ້ນ ຈື່ງເກີດມີ ການຮ່ວມມືໃນການຈັດຕັ້ງ ‘’ ກອງທຶນສົ່ງເສີມ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນ ດອກເບ້ຍ 6% ຂອງ ສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ ” ລະຫວ່າງ ສະພາການຄ້າ ແລະ ອຸດສາຫະກຳແຂວງ ສະຫວັນນະເຂດ ກັບ ສະຖາບັນການເງິນ ຈຸລະພາກທີ່ຮັບເງິນຝາກສາຍໃຍສຳພັນ ໃນຄັ້ງວັນທີ 13 ພຶດສະພາ (05) 2022, ທີ່ຫ້ອງອາຫານຮຸງທິບ
III ຂໍ້ມູນກ່ຽວກັບກອງທຶນ
ກອງທຶນສົ່ງເສີມ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນດອກເບ້ຍ 6% ຂອງ ສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ ສະໜອງສິນເຊື່ອໃຫ້ແກ່ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ
1. ວົງເງິນກູ້ທັງໝົດ: 10 ຕື້ກີບຖ້ວນ ໄລຍະຈັດຕັ້ງປະຕິບັດກອງທຶນ: 5 ປີ
2. ຂໍ້ມູນພື້ນຖານດ້ານສິນເຊື່ອ:
– ສະກຸນເງິນ: ການປ່ອຍກູ້ເປັນເງິນກີບ
– ອັດຕາດອກເບ້ຍ: 6% ຕໍ່ ປີ ( 0.5% ຕໍ່ເດືອນ )
– ໄລຍະກູ້:
ທຶນໝູນວຽນໄລຍະກູ້ຢືມ 3-5 ປີ
ທຶນຄົງທີ່ ໄລຍະກູ້ຢືມ 1-2 ປີ
– ວົງເງີນອະນຸມັດ
– ໄລຍະປອດຕົ້ນທຶນແລະ ດອກເບ້ຍ: ກຳນົດ 6 ເດືອນທຳອິດ ເລີ່ມເດືອນທີ 7 ເປັນຕົ້ນໄປແມ່ນຊຳລະຕົ້ນທຶນ ພ້ອມ ດອກເບ້ຍ.
3. ເງື່ອນໄຂໃນການເຂົ້າຫາແຫຼ່ງທຶນ
4. ພື້ນທີ່ໃນການໃຫ້ສິນເຊື່ອ
5. ວິທີເຂົ້າຮ່ວມກອງທຶນ
- ຕ້ອງລົງທະບຽນຄຳຮ້ອງຂໍກູ້ຈາກ ສູນບໍລິການວິສາຫະກິດຂະໜາດນ້ອຍ ແລະ ກາງ ທີ່ຫ້ອງການ ສະພາການຄ້າ ແລະ ອຸດສາຫະກຳແຂວງສະຫວັນນະເຂດ, ເບີໂທ 041 253 325 , 020 5406 6512, Email : savanssc@gmail.com
- ນຳເອກະສານທັງໝົດທີ່ໄດ້ຮັບຈາກສະພາການຄ້າ ແລະ ອຸດສາຫະກຳແຂວງ ຢືນຕໍ່ສະຖາບັນການເງິນ
- ສະຖາບັນການເງິນຈະດຳເນີນການຄົ້ນຄວ້າ ແລະ ກວດສອບຫຼັກຊັບຄ້ຳປະກັນ ລວມເຖິງການລົງພື້ນທີ່ຕົວຈິງ ເພື່ອກວດຫຼັກຊັບ ແລະ ກິດຈະການນັ້ນໆ.
- ສະຖາບັນການເງິນຈະໃຊ້ເວລາໃນການພິຈະລະນາເງິນກູ້ເປັນເວລາ 07 ວັນ ໃນວັນລັດຖະການ ຫຼັງຈາກໄດ້ຮັບເອກະສານຄົບຖ້ວນພ້ອມທັງໄດ້ລົງກວດກາຫຼັກຊັບຄ້ຳປະກັນ ແລະ ກວດກິຈະການຮຽນຮ້ອຍແລ້ວ
IV ບົດລາຍງານການສະໜອງທຶນ ດອກເບ້ຍ 6% ຕໍ່ປີ ຂອງ ສກຈຮສສ.ສຂ
ບົດລາຍງານຜົນການຈັດຕັ້ງປະຕິບັດ ຂອງກອງທຶນ ປະຈຳປີ 2022 ໂດຍສັງເຂບ
ກອງທຶນສົ່ງເສີມ ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ໃນການເຂົ້າຫາແຫຼ່ງທຶນ ດອກເບ້ຍ 6% ຕໍ່ປີ ຂອງ ສະຖາບັນການເງິນຈຸລະພາກທີ່ຮັບເງິນຝາກສາຍໃຍສຳພັນ ໄດ້ມີການ ຈັດຕັ້ງປະຕິບັດຢ່າງເປັນທາງການ ໃນວັນທີ 15 ພຶດສາພາ 2022 ເຖິງ 30/12/2022, ຄະນະ ຮັບຜິດຊອບຈັດຕັ້ງປະຕິບັດກອງທຶນ ໄດ້ເປີດມີການເຜີຍແຜ່ຢ່າງເປັນທາງການ ຈຳນວນ 03 ຄັ໊ງ ແລະ ໃຫ້ການບໍລິການ ແລະ ຄຳປຶກສາໃນການເຂົ້າຫາແຫຼ່ງທຶນດັ່ງກ່າວ ຈຳນວນ 30 ຄັ້ງ ໃນປີ 2022 ຜ່ານມາ, ເຊີ່ງສາມາດເກັບກຳສະຖິຕິໄດ້ ຈຳນວນ 260 ຫົວໜ່ວຍທຸລະກິດທີ່ໃຫ້ຄວາມສົນໃຈ. ໃນນັ້ນ ປະກອບມີ ຂະແໜງການຜະລິດສິນຄ້າກະສິກຳ, ຫັດຖະກຳ, ການບໍລິການ, ການຄ້າ ແລະ ຂະແໜງກະສິກຳ ປູກຝັງ ແລະ ລ້ຽງສັດ.
ຜ່ານການເຜີຍແຜ່ ແລະ ໃຫ້ຄຳປຶກສາໃນການເຂົ້າຫາແຫຼ່ງທຶນດັ່ງກ່າວ ເຫັນວ່າມີຜູ້ປະກອບການ ໄດ້ປະກອບແບບຟອມພ້ອມເອກະສານຂໍທຶນ ນຳກອງທຶນ ຈຳນວນ 5 ຫົວໜ່ວຍທຸລະກິດ ໃນວົງເງິນສະເໜີກູ້ ລວມມູນຄ່າ 780,000,000 ກີບ ແລະ ສາມາດອະນຸມັດໄດ້ ຈຳນວນ 03 ສັນຍາ ມູນຄ່າ 480 ລ້ານ ກີບ. ແລະ ສ່ວນຜູ້ປະກອບການສ່ວນທີ່ເຫຼືອ ຍັງຄົງກະກຽມບັນດາເອກະສານຕ່າງໆໃຫ້ຖືກຕ້ອງຕາມເງື່ອນໄຂຂອງກອງທຶນ.
ຮູບພາບຂະແໜງການທີ່ໄດ້ຮັບການອະນຸມັດ
ຂະແໜງຫັດຖະກຳຕໍ່າແຜ່ນ
ຂະແໜງຫັດຖະກຳຕໍ່າແຜ່ນ
ເພື່ອຮັບປະກັນໃນການຈັດຕັ້ງປະຕິຂອງໂຄງການ ໃຫ້ສາມາດ ຈັດຕັ້ງປະຕິບັດຕາມຄາດໝາຍ ແລະ ໄດ້ຮັບຜົນສຳເລັດ ໄດ້ເປັນຢ່າງດີ ຄະນະຮັບຜິດຊອບໂຄງການ ໄດ້ມີການປະຊຸມ ແລະ ປຶກສາຫາລື ພ້ອມດ້ວຍ ການກຳນົດໄລຍະເວລາການຈັດຕັ້ງປະຕິບັດໂຄງການ ແລະ ໃຫ້ມີການປະເມີນຜົນໄລຍະ 6 ເດືອນເບື້ອງຕົ້ນ ເພື່ອແກ້ໄຂບັນດາອຸປສັກ ແລະ ຂໍ້ຫຍຸ້ງຍາກ ໃຫ້ແກ່ຈຸນລະວິສາຫະກິດ ແລະ ວິສາຫະກິດຂະໜາດນ້ອຍ ສາມາດເຂົ້າຫາແຫຼ່ງທຶນ 6% ຕໍ່ ປີ ໄດ້ສະດວກຂື້ນ.
ຮູບການກອງປະຊຸມປຶກສາຫາລື ການຈັດຕັ້ງປະຕິບັດໂຄງການ ຂອງ ສຄອ.ສຂ ຮ່ວມກັບ ສກຈຮສສ.ສຂ
